الأربعاء، 30 يوليو 2014

مدينة البهائم 4: علاقة سرية

زوزو كان مصاحب صبية اسما زوزاية بس زوزاية بنت خجولة واهلا محافظين وبما انون من غير دين فقررو يخلو علاقتون سرية. 

هلق جوجو صديقو العزيز لزوزو سمع من صديق مشترك الخبرية فاجا عم يعاتب زوزو.



جوجو: ولو يا زوزو صاحبك العزيز وما بتخبرني.
زوزو: شو ما خبرتك خيي.
جوجو: انك مصاحب زوزاية.
زوزو: مش صحيح هالحكي. هيدي اشاعة مين خبرك انت.
جوجو: ولو كل الشباب ضاجين فيها. 
زوزو: كذب هيدا. صرلي زمان ما شفتا اصلا.
جوجو: ولا الجمعة الماضية شافوكون بفاريا انت وياها. ومستأجر شاليه كمان.
زوزو: لك كان عيد كوكاية رفيقتا فوق. 
جوجو: والله ايام. صرت تطلع عفاريا. كل عمرك تاكل مناقيش عند الغلاييني. 
زوزو: خيي عال. الانسان بيتطور.
جوجو: بعدين هيك بطلت تحكي معنا. كوكو تجوز ما طليت علينا سألت بدكون شي خيي. 
زوزو: والله ما عم افضى بالشغل نهائيا. بس قالتلي زوزاية عن العرس.
جوجو: اه منيح زوزاية عم تخبرك. شو مخبرتك كمان. 
زوزو: ما عجبا العرس كتير صراحة. قال الفرقة مش حلوة والبقلاوة مش طيبين وفستان العروس مش كتير والسهرة مملة والاكل مش هالقد. 


جوجو: والله كل العالم كانو مبسوطين. بس يبدو زوزاية نكدة.
زوزو: عمول معروف. ما تحكي عنا بالعاطل. 
جوجو: ما عاساس مش مصاحبين. ليه ولعت هيك بس جبت سيرتا.
زوزو: خيي مش مصاحبين. بس ما بريد تحكي هيك.
جوجو: الله يوفقك خيي.
زوزو: بعدين خيي انت عم تحكي. ما مرتك ما بتشبه شي من بشاعتا. 
جوجو: خيي مرتي بشعة ومجوزين صرلنا خمس سنين على سنة الله ورسوله. 
زوزو: لك روح. ما بتضلك مختلف انت وياها. 
جوجو: مشاكلي انا وياها بحلا بالبيت. انت شو دخلك. مش احلى من هاي اللي معك. 
زوزو: لا تخنتا كتير. ما بسمحلك.
جوجو: ولا زمك. مينك انت لتسمحلي. 

وكاد الموقف يتطور لمشكل لولا وصول كوكو وتدخله وابعاد زوزو خارجا. 

السبت، 19 يوليو 2014

مدينة البهائم 3: دوللي

 l
زوزو وجوجو صديقين منذ ايام الطفولة. لكن جوجو كانت شخصيته ضعيفة. لذلك كان يقتدي بزوزو في كل ما يفعل. ذهبا يوما عند بربر.
وقد كان زوزو سمينا وجوجو صعلوكا

زوزو: انا بحب شاورما لحمة. رح اطلبلي وحدة
جوجو: انا كمان طلبلي وحدة
زوزو: بس امك قال انت بتحب الدجاج مش اللحمة.
جوجو: لا شو امي بتعرف اكتر مني.

زوزو: طيب شو بعد. مناكلنا تنين فاهيتا.
جوجو: ايه مناكل.
زوزو: انت فيك تكملون يا زلمي.
جوجو: ايه ليش لأ.

زوزو: انا بعد ما شبعت. رح اطلب تنين فرانسيسكو.
جوجو: طيب انا كمان.
زوزو: واثق من حالك. ما تعملي قصة هلق.
جوجو: (وهو غير قادر على التنفس من شدة التخمة) ايه بقدر.

بعد خمس دقايق شوهد جوجو وهو يتقيأ مصارينه بجانب السوكلين حد بربر.

2
زوزاية: شو صايرة كتير عم تعطي وج لزوزو.
جوجاية: ايه بحسو مهضوم وبيضحكني.
زوزاية: ايه لا ما تضحكيلو بس ينكت. انا ما بحسو مهضوم على كل حال.
جوجاية: اوكي. متل ما بدك.  مع انو انا كنت انجذبلو اخر فترة.
زوزاية: يي شو في فرق بينو،وبين رورو وجوجو. هيدا مهضوم وهوليك مهضومين.
جوجاية: طيب بركي بكرا منروح معون.
زوزاية: شو بكرا،اليوم بحكيهون.
جوجاية: ياي شو رح نتسلى.
زوزاية: قلتلك خليكي لاحقتيني بتعيشي احلى عيشة.



3
زوزو(لاصدقائه) : هلق بس يجي هيدا الحمار رورو . برشو. يا زلمي لابس تياب بشعين  بشكل. صرنا حاكيينلو مليون مرة ووضعو منيح بس هوي حمار.

يدخل رورو الى الغرفة.
رورو: شو الشباب.
كوكو: ريتك تضرب بهالمنظر.
 رورو: خير شو في.
جوجو: ولا شو لابس بحياة الله. في شي دكتور بالعالم بيلبس هيك.
نونو: يخرب بيتك. هيدا لون قميص بينلبس. شو دين ربو هيدا فوشيا ولا شو.
فوفو: بعدين كيف ملبقون عبعضون.  لا ولابس سبدرين كمان.
زوزو: روح انقبر فل من وجي.

رورو يخرج حزينا.

زوزو يضحك : برشناه.

الأربعاء، 2 يوليو 2014

مدينة البهائم 2: قصة الفستان

زوزاية بنت يتيمة. كانت اما خياطة وعلمتا المهنة قبل ما تموت. وماتت الام وكملت زوزاية بمهنة الخياطة. 
زوزاية عايشة بالبيت مع اخوتها يللي ما بيشتغلو شي وكل واحد منون راسو غريب. 
زوزو خيا لزوزاية حدا بيعتبر حالو "مفكر كبير" بينظر وبيفكر، هاي شغلتو طول النهار وما بيطلع من البيت بس بينظر. يعني فعلياً ما بيعمل شي.
جوجو خيا التاني حدا كتير سميك الدم، شغلتو وعملتو يتمسخر ويهد حيطان ويضحك وكمان ما بيعمل شي.
كوكاية اختا لزوزاية مجوزة وعايشة برات البيت. بتقضيها مسلسلات و افلام. فعليا ما بتعمل شي. 

بيوم من الايام، اجت زبونة عند زوزاية. زبونة كتير مهمة ومعا مصاري وزوجا قاضي. وطلبت منا انو بدا تصميم فستان لعرس بنتا. بس طلبت منا انو تخلصو بعشر ايام. 
بلشت زوزاية تشتغل وحست حالا انو مضغوطة كتير ويمكن ما تلحق تخلص الفستان بالوقت المناسب. 
ففكرت انو تستعين باخوتا ليساعدوها. 
حكيت زوزو بالاول. قالتلو هيدي فكرة الفستان فاجا زوزو وبلش ينظر عليها. هيدا الفستان كتير طويل بعدين لونو هيك احمر ما حلو......
رجعت حكيت جوجو. فاجا جوجو وبلش مسخرة: "ليك ملا فستان. هيدا فستان ولي بدك تبيعي لمرة القاضي. لا وبدك تخلصي بعشر ايام. هاهاهاها" .
جربت تحكي كوكاية عالواتساب. ما ردت. بعتتلا فايسبوك ما ردت.فايبر ما ردت. بعتتلا ايمايل، لينكد اين وعملتلا تويت ما ردت. دقتلا عالتلفون وما ردت. بعد شي ساعة بترد عليها عالواتساب: "يي سوري زوزاية بس كنت عم احضر حريم السلطان وهلق رح يبلش Game Of Thrones وبعد شوي جايي زوجي بدو يعمل عشا وهيك، بدك شي؟" 

احتارت زوزاية شو بدا تعمل. كملت شغل وفكرت تحكي ابن الجيران. طلعت ندهت لرورو ابن الجيران وخبرتو شو القصة. نزل رورو وضلو يساعدا لحد ما خلصو العشر ايام وخلص الفستان بنجاح. 

اجت مرت القاضي بعد عشر ايام وشافت الفستان واعجبت فيه كتير ودفعت لزوزاية حفنة من المال. 

ومن يومتها زوزاية بتشتغل من دون ما تسال اخوتها.