الأربعاء، 17 ديسمبر 2014

تفسير احلام

شو مدى الحدود بين الحلم والواقع؟ سؤال صار عم يطرح حالو عليي مؤخرا بشدة.
لانو عامة على قد ما هوي الواقع صعب وين ما كنت و شو ما كانت نوعية شخصيتك(حتى لو كنت كتير متفائل) اخر شي بتسلملو لهالواقع باحلامك وبتصير تتنازل شوي شوي. فكيف اذا
كنت متشائم ، انسى الموضوع. خود على اكتئاب وبكي ونحيب ودوا اعصاب.
بعد فترة بتبطل تحلم بتصير معود انو تنام الليل بهدوء. لشو الحلم اذا تاني نهار مع وج الضو رح يكون ميت. خليه ميت باللاوعي.
اذا بتنسى الاحلام وبتعيش متلك متل هالناس.
وفجاة بتكون عايش هالواقع بفحاجتو وسلبيتو هيك وفجاة بتمرق بشي كنت ممكن عامة انو تحلم في . شي ايجابي بيغير هالفجاجة لهنيهات . ليك بتضلك فترة ممكن مضعضع. وممكن تضل طبيعي بس مش مصدق انو هيدا الشي صار معك انت بالتحديد. انت المتشائم . بتضحك.



وعامة الحلو بهالحياة، حياتي انا على الاقل رغم كل فجاجتا وسلبيتي انو عم اقدر حقق كتير احلام بس بيجو ماخرين مع Delay  بالانجليزي انو الحلم يللي كان مفروض تعملو بعمر 18 بتعملو بعمر 26 بس انو بالاخر عملتو. وبتصير تتطلع وتضحك. انو ليك بالاخر عملت شي. ان تاتي متاخرا افضل من ام لا تاتي ابدا. وهيدا الشي قدرت اعملو بكل مجالات الحياة تقريبا: بالشغل وبالدرس وبالسفر وبالثقافة وبالموسيقى وبالمصاري وبالصداقة وحتى بالعلاقات العاطفية (اسوا مجال لالي).
وبمطرح من المطارح كمان بتحس انو احلى الاشياء يللي تحققت هيي اقل الاشياء يللي بتركض وراها  اما الاشيا يللي بتضلك راكض ومصر عليا احتمال كتير ما تصير. تروك التاريخ يلعب صدفو. اكتشاف مهم. هوي التاريخ بيجبلك يللي بدك ياه.

تروك التاريخ وحلام. احلام هنيئة.

الجمعة، 28 نوفمبر 2014

فرويد.. أنقذني من زوكربرغ


كنا في اواخر  العام 2007 حين تلقيت رسالة على بريدي الالكتروني من قريب في الولايات المتحدة تدعوني للانضمام الى شبكة الفايسبوك.
بطبيعة الحال انضممت . حينها لم يكن للفايسبوك وهج في لبنان وكان عدد الاصدقاء قليل . جلهم من اصدقائي الثانويين او الجامعيين في اختصاصي الاول (يمكنكم معرفة هذه المعلومات على صفحتي الفايسبوكية(.
بعدها بسنة هاجرت بعد ان اتممت دراستي (كما يفعل معظم الشباب اللبناني ) خلال هذه الفترة كان عدد الاصدقاء يتزايد وتبين ان الفايسبوك مساحة لنشاط سياسي من ناحية (هل حقا ساهم الفايسبوك في الثورات العربية؟) ومساحة لقتل ملل الغربة من ناحية اخرى. كما انه كان مساحة تعبيرية  لي كشخص غير اجتماعي يفضل التعبير كتابيا .
حتى هذه المرحلة كان للفايسبوك ادوار ايجابية اجمالا وربما لا يزال يؤدي بعض هذه الادوار.


ولكن فلنحسب ما حدث بعدها:
·         الخلافات السياسية التي كانت تصل الى حد الشتائم وانقطاع العلاقات والتهديد احيانا. ولكن لا تعتبوا علينا اذا كان بوتين واوباما يتجادلان تويتريا .
·         المحاولات العاطفية. قد يعجبك بروفايل احداهن وتتجاذب اطراف الحديث معها الكترونيا ولكن الطامة الكبرى تكون حين تكتشف ان الواقع غير العالم الافتراضي. تراجع اغنية ميشال كسرواني "مايك وغرايس" (عملتلا share على صفحتي)
·          كل هذا يهون امام التجسس الاستخباراتي الذي صار اسهل. ظل شخص يدعي انه من مجاهدي خلق يتصل بي وباهلي عبر ارقامي المنشورة على الفايسبوك لحوالى الشهرين طالبا مني مساعدته ."العما كيف"؟
·          اما الادمان فحدث ولا حرج والوقت الضائع من طريق العمل او الدرس او النشاط السياسي او الاجتماعي او اي شيء آخر. بالمناسبة ترافق ادمان الفايسبوك مع ادمان التدخين، الى ان اقتنعت اخيرا باغنية منير الخولي عن اضرار التدخين فاقلعت عنه وكتبت عن هذا الانجاز على صفحتي الفايسبوكية.
·          والاخطر، الامراض النفسية المزمنة.  تعليق من هنا ولايك من هناك على جملة قد تكتبها فتخال انك محمود درويش. وفلانة تضع صورتها في نيو يورك وتنهال الاعجابات، وفلانة تضع صورتها كيفما تحركت بين المطبخ والبالكون وفلان يرمي النكات وتنهال الضحكات من كل حدب وصوب. كان مظفر النواب يقول ما اوسخنا، ترى اين اصبحنا اليوم: ما اسخفنا، ما اتفهنا.  
ساتبجح كثيرا و "انق" هنا عن اضرار الفايسبوك وانا للتو احاول نشر هذا المقال بالذات.
ها انا في فرانكفورت اتصور واضع صورتي على حساب الانستاغرام الموصول على تويتر الموصول بدوره على فايسبوك. والله لو اتت مدرسة فرانكفورت بمفكريها كلهم ماركوزه ورايخ وادورنو و بنجامين وهوركهايمر لن يستطيعوا تحليلي نفسيا.
انقذني يا فرويد. ان زوكربرغ يحاصرني.

الثلاثاء، 18 نوفمبر 2014

بكائية الرحيل

لا ترحلي،
يا فتاتي ،
لا ترحلي الآن،
بعد ان بتنا على تخوم السقوط سوية
في لجج هذا البحر الغدار،
لا ترحلي
و دعي ضفائرك تقتات من كتفي
علها تطفئ صقيع القلب القارس،
ولندع جسدانا يتعانقان رويدا رويدا،
علنا نطفئ نيرانا تشتعل تحت رماد المقل،
اننا ندرك سويا ان كلانا مجنونان هادئان،
نتطرف في انحيازنا
تارة لاسراف في الهدوء
وطورا لتبذير في الجنون،
تعالي اكون كاباك وتكونين كامي
ونسكب حنانا يقينا  حنين البعد.
الآن سترحلين،
بعد ان بدأت نعومتك تلامس شغاف القلب،
وصوتك الوادع ينساب عذبا
رقراقا على مسمعي،
وثغرك الباسم يغتال سكوني،
الآن سترحلين،
يا وردة اقطفها من بين الاشواك،
سأهديكي ورود الأرض قاطبة،
كي لا ترحلين.



لكننا نهاب البوح يا فتاتي،
لذا ايقنت كما دائما،
سترحلين،
سيقتلني الوقت
ويكفنني النسيان،
وادور من بعدك على الخمارات
تسقيني الراح
وافتش عن طيفك اسامره.
غير مجد رجائي،
لكني ارجوكي،

لا ترحلي.

الجمعة، 14 نوفمبر 2014

هذيان

يعني متوقع انو اذا قعدت عالبار وهالصبية حدك ممكن تجذبا. بطبيعة الحال بهالوج المكش صعبة. وانت عامة ما بتنفرج اساريرك غير ما تعرف بواطن الاشخاص وتتعود عليون. هيدي ما رح تجذبا مع انو هيي للحظة بتفكر انو يا ريت بيحكيني هالبغل . وبتصير تحكي مع صاحبتا وتتضحك وهيديك تقلا ما شايفة كيف مجومس. فعلا بغل ما بيحس. هلق هيي ما عارفة عنك. لك انت معاشر بنات ومصاحب وما قدرت تجذب ومن ايدك يعني لانو انت ما بدك بتخاف من الارتباط . فهاي هلق بقعدة بار و قنينة بيرة بدك تجذبا. اتطلع بالحيط يا بغل


عم تتخيل معي الواحد بس يروح العدو يللي مقابيلو شو بيحس. هلق لاول وهلة بيفرح انو هاع ليك هيدا التعن دينو بعدين بيفكر بالموضوع انو العما كيف بندبر حالنا هلق. فيها ضعضعة المسالة مش سهلة. هيدا انا كنت باني حياتي عاساس وجودو. فجاة هيك بيختفي. خود مثل يا اخي. سقط الاتحاد السوفياتي او انهار. الاميركان امبسطوا بس اخرة النهار بلشو يفكرو انو هلق بطل في عدو كيف بدنا نكمل قامو اخترعو صراع الحضارات و القاعدة وهلم جرا. وقس على ذلك يعني من اميركا وروسيا لانت وجارك اللي ما بتطيقو مثلا.

مجرب تعمل شي صرلك فترة مش عاملو. تلعب فوتبول بعد فترة مش لامس طابة. لاول مرة يمكن من اكتر من 10 سنين بعمل شي بيشبه الرقص، هوي مش رقص فعليا ، منو دبكة ولا رقص شرقي ولا كوريوغرافي اعوذ برب الفلق، ولا تانغو وسالسا من بتوع المدارس، شي اقرب للتدفيش، ما بدو تعليم، حلبة مصارعة، بتتناغم مع الموسيقى العنيفة، بس مش مصارعة، شي اخوي اذا حدا وقع بتلمو. خيك هيدا بيصير. حلوة ها. في كمية غضب كانت عم تطلع شي محبوس من فترة. غريبة هيي بس تفكر فيها ومنا طبيعية . بس مين قال انو مفروض تكون الاشيا طبيعية وايمتى عملت شي بيشبه العالم.

بالمصنع؛
-
مادام، المكنة تبعي عم تزعجني كتير و صوتا كتير عالي. في طريقة نلاقيلا حل.
-
ما في شي يا ولد، كمل شغل عادي.
-
مش سامعك.
-
كمل شغل عادي.
بعد اسبوع:
-
مادام المكنة انتزعت وصوتا عم يروح. في مجال نغيرا.
-
ما بها شي كمل شغل عادي.
-
طيب فيكي تشتغلي محلي، انا لا طايقك ولا طايق المكنة.
-
عم تهاجمني.
#
يتدخل عامل ثاني.
-
زميل المكنة انتزعت كليا . رح ننقلك عقسم جديد مع الاستاذ.
-
باي مادام (بلئمنة).


الخميس، 30 أكتوبر 2014

دروس في الهدوء

وتخفت قهقهة العاهرات،
تضطجع المدينة بعد عطلة نهاية اسبوع،
يترنح السكارى على الطرقات،
تبتسم شقراء بخجل وابتسم،
نتضاحك سرا،
على مجموعة ثملين عائدين من علب الليل.
ارتشف نبيذا احمر،
وانا اراقب ذاك الجمال الهادئ،
الهادئ الذي يذبح،
ذبحا لا كذاك القادم من نشرات الاخبار
الأخبار سيأتيك بها من لم تعلم:
الشرق في احتراق ازلي،
الشمطاء يأفل نجمها،
أعداء يتهاوون،
وأصدقاء يضطربون.

و أنت في منفاك الريفي
الذي لا يزعزع سكونه
سوى هواء يمر ناعما على ورق خريفي،
كما تمر الايام بسرعتها الهادئة،
وانت في حقلك الريفي،
تشذب شجرة الاصدقاء بعناية،
كما كنت تفعل منذ الصغر،
أيها الريفي الاحمق،
تندغم اكثر بما تبقى من اوراق على الشجرة،
تعقد هدنة مع التاريخ،
كي تستطيع ان تنام باكرا ايها العجوز بهدوء،
لا شيء يؤرقك سوى الذكريات،
حين تخرج من اللاوعي،
فتحرقها كي تنعم بالهدوء.
"نم يا حبيبي ساعة"،
تتضاحك مع الشقراء على الثملين،
وانت سرا تتضاحك على التاريخ.
"نم ساعة"،
وتنام من فرط الهدوء،

"نم ساعة"

الاثنين، 20 أكتوبر 2014

90 سنة

مرحبا انا شب لبناني. ربيت عتقاليد لبنانية منها مثلا احترام الكبير. في متلها هالعادة مثلا. خاصة اذا كان الكبير بالعمر كبير بالفكر وبالتضحية وبالاخلاق.
بس يا خيي جيل اليوم ما عندو كبير، بيطلعلك واحد جربوع بدو يهجم عبيو وجدو. ووحدة مش معروف قرعة بيا منين بدها تضحك عزلمي ختيار لانو مش قادر يمشي مزبوط. هاي بيقولولا عنا وجع يخلع نيعك خلع.
ولا هيدا جدك هيدا لولا انت ما كنت موجود. فاحترم نفسك واحترمو هاي اهم شي. شايفلو وجو مجعد. عمرو 90 لانو. بس ليك هيدا شب اكتر منك. هيدا بعقلو بيوزن بلد. هيدا العصاية يللي عم يتكي عليها هادد فيها جبال.
عرفتو عن مين عم احكي. اكيد لا. كل مرة ما بتفهموني لما اعطي امثلة فرح احكي مباشر.
هيدا اللي عمرو 90 ،  هيدا الحزب الشيوعي اللبناني .
عرفتو. في ناس ما بيعرفوه. في ناس ما بيعرفو مين ولادو. فينا نسميلون ياهون. بس تيعرفو حتى اذا جربو يحكو بالعاطل عن معرفة يلزمو حدودون واذا عن جهل يخرسوا افضل. لانو ليكو ما بقا  مسموح التطاول كيف ما كان. مش انا يللي عم هدد. بس هيدا حزب تاريخيا وفكريا عندو عنف ثوري. فهيدا الشي ممكن بايا لحظة يرجع. يعني خاصة انو طول عمرون العمال يللي هني اساس هالحزب ما عندون شي يخسرو غير قيودون. يعني ما بتعرفو بايا لحظة بيرجع بيدير ضرب الرصاص. خاصة انو اليوم الظروف مؤاتية كتير. ليس. ما علينا.  
خلينا نسمي يا اخي في ناس فقدو الذاكرة وفي جاهلين وفي عملاء وفي متواطئين وفي خونة وفي متخاذلين وفي فاشيين وفي طائفيين وفي صهاينة. هول رح نضلنا نحاربون كيف ما كان برصاص وبكلمة وبنغمة. هيدا  حدا عمرو 90 . عندو ولادو كتير ووين ما كان منتشرين.
هيدا ناهل من تراث ماركس وانجلز ولينين وستالين كمان. ما حدا يجي يقلي هلق هول يهود وماسونية. وما حدا يقلي قتلو عالم. يمكن قتلو بس اللي لازم ينقتل. عاساس انو الزعماء بلبنان وبالعالم العربي و ببلاد الغرب ملايكة. ما هول كلون قتلو واكتر وباسم الله وانبيائو.
هيدا ناهل من تراث غيفارا وكاسترو حرب انصار باسم الجبهة جمول منغنجا نحنا.
هيدا ابنو فرج الله الحلو يللي دوبو بالاسيد لانو رفض يخضع لقرار التقسيم، لانو فلسطين كانت وبعدا اولوية. ولانو رفض يخضع لنظام عربي قمعي بعدنا عم نتوارثو
و هيدا ابنو جورج حاوي يللي فجرو لانو كان عابر للطوائف. هيدا اول واحد قوص عاسرائيل وقت اللي غيرو رش رز.
هيدا ابنو شيخ متل حسين مروة، شيخ درس تاريخ حضارة  عربية اسلامية لبقتلو قوى اسلامية ظلامية بيسموهو.
وهيدا ابنو مهدي عامل يللي دقنو بتوزع فكر عالعالم والفكر بيخوف الجهلة فقتلو تيترتاحو.
هيدا بناتو لولا ووفاء ويسار  وهيدا شبابو جمال وميشال . سامعين بطرابين الحبق هودي طرابين الحبق يللي ضحوا بشبابون منشان الوطن. هول شيوعيين
هيدا ابنو فرج الله حنين شهيد الجامعة ووردة بطرس شهيدة النقابات. هيدا عامل كتير للشعب وللبلد.
ولك يا عمي ان ضليتني عد ما بخلص. عيلة كبيرة كتير وبفتخر بكل واحد فيها.
من بعد هالحكي اذا حدا بيفتح تمو من هلق لشهر بيشوف شي ما بيعجبو.  في نياع بدا تنخلع وفي رقاب بدا تنفك.  ايه نعم انا الجبان عم هدد. بس انا متل غيري ما عندي شي اخسرو. وما خايف من شي حتى الموت. هيدا الحد الاقصى. ما انا عنصر زحاف بهالعيلة. واذا انا الجبان وهيك فكيف القبضايات.
اذا ما حدا يحكي. بدنا نعيد ونفرح .
بعد العيد لكل حادث حديث. يمكن نفوت عمستشفى بس تنطلع اقوى .  ويمكن يصير كتير اشياء.
بس اوعى تفكرو انو هالختيار يللي عمرو 90 رح يموت. فشرتو برقبتكون. هيدا ختيار اذا شفتو تعبان بتساعدو بتقلو قوم يا جدي. مش بتقعد تدفش فيه.
  معقول يموت حدا عندو هالعيلة. ما رح يموت قبل ما نموت نحنا او يللي رح يجو من بعدنا.
هيدي سنديانة حمرا ما بتموت . في ورق بيوقع. بيطلع غيرو. في ناس بتجرب تقصا ما بيطلع بايدا. مشرشة بالارض.

هيدي سنديانة حمرا. هاي احلى سنديانة.

الأحد، 19 أكتوبر 2014

فروقات 1: لبنان VS فرنسا






1-     فرق اول - الثقافة:
لبنان: اذا لعبت واتساب وانت عم تسوق السيارة: انسان طبيعي.اذا قريت كتاب بوسيلة نقل عامة او عجنب الطريق او حتى ببيتك: انسان مجنون.
اوروبا:اذا قريت كتاب بالمترو او عجنب الطريق او بالحمام او بحي الله مطرح : انسان طبيعي جدا.
فرق اول مريح

2-     فرق تاني – الاكل:
لبنان: ساندويش شاورما من عند بربر اسمو شاورما وبتختصرو اكتر بدجاج ولحمة.
فرنسا: ساندويش شاورما دجاج اسمو بيصير Kebab . لا وزيادة ممكن ينعمل بخبز ال Taco . ايه معليه الكباب انواع : حلبي، اسطمبولي، اورفلي، ... ومش عدجاج.
لبنان: اكبر طبخة اسما بيضلو صغير كلمة: ملوخية، مغربية، رز عدجاج يا اخي. وكلو بتعرفو كابن البلد.
فرنسا: اصغر صحن يللي بيكون entrée اسمو مكون من شي 4 كلمات والمشكل بدك تفهم. انو بحمل Dictionnaire معي عالمطعم. مش مقبول. طيب هيدي كيف بفهما مثلا
Une flammekueche, tarte flambée   alsacienne, à base de lardons et d'oignon 
بجيب كتاب اناهيد بالفرنسي يعني؟
بس فعليا رغم صعوبة الاسماء بس في اكلات طيبة وغريبة سواء من المطبخ الفرنسي او من مطابخ العالم المختلفة.
فرق تاني مريح ومش مريح

3-     فرق تالت – النقل:
فرنسا: اليوم لاول مرة من شي شهر بطلع بسيارة. عم تتخيلو الموضوع. مش هينة ابداً. استقلالية تامة عن التبعية للسيارة. يمكن مش شي مهم. بس انو الي مهمة ومش متعبة.

لبنان: لانو ما كنت حب سوق ولاني حمار سواقة. ولانو اكتر شي كان فيها قرار نكاية كانت مجرد التخلي عن السيارة بالبيت و اختيار وسائل نقل عامة (اذا سميناهون هيك) كان قرار متعب. بس بتاخد القرار كجزء من النكاية المستمرة بالمجتمع. متل ايا قرار نكاية تاني اخذ من نوعية السهر للبنات للتتييس بكتير مطارح. 
هون الحرية بتغنيك عن النكاية. ما في حاجة تعمل نكاية لحدا. هيدا اذا كان في حدا لتعملو نكاية.
فرق تالت مريح






4-     فرق رابع – الدخان:
هون بترتاح من الدخان. فيك عالقليلة توقف. عندك اسباب مقنعة: السبب المادي اهما. علبة بحق كروز. مش منطقي. بعدين اهم شي السبب الصحي المزمن. وسبب الريحة. اكره شي بالدخان الريحة. بتحط كولونيا ما بتاثر. الروايح البشعة بتغطي عالحلوة. متل ما بيغطي ايا شي بشع عايا شي حلو. وعندك هون اهم سبب للاقلاع عن الدخان: الراحة النفسية، فضاوة البال ، هاي حقا مصاري. ما عندك نفس وجعات الراس اللي بتخليك تفكر باستمرار وعندك حرية مش متاحة هونيك.
الحرية هون حلوة كتير احيانا بتكون مزعجة. حرية مرا او زلمي عمرو 90 سنة يتزلط عالبحر مش حلوة. حرية انو جارك بالمترو يسمعك  موسيقتو من سماعتو مش حلوة. وقفلي هالتكنو يا اخي. صرعتني ..... الخ
 بس شو ما كان بتضل الحرية حلوة.

5-     فرق خامس – الشحادين :
بتصادف ناس بالشوارع. بس هون بيكونو من ايدون. بلبنان لبنانيين او لاجئين سوريين. اطفال او مرضى بيتم استغلالون من قبل مافيات.
هون في انواع بس في جزء كبير من الفرنسيين العاطلين عن العمل ويللي مشردين. رغم تشردون بيكونو مربيين كلاب وطبعا بيحششو وبيشربو بشكل مكثف. بس اللذة انو فيهون نماذج غريبة. شحاد بالطريق عم يقرا او عم يدق موسيقى. او بيكون حاطط شي حكمة فلسفية ليشحد مش ستيريو: الله يخليك ، الله يوفقك ، الله ....
وفي نوع تاني غجر او عرب. هني فعليا ازمة كبيرة. بس ما بعرف شو الحد الفاصل بين انو يكونو الفرنسيين عنصريين تجاهون وبين انو هني بستاهلوها بمحل من المحلات نتيجة تصرفاتون.