الأربعاء، 30 يناير، 2013

ناموا هنيئاً يا سفلة

- حسناً،
لقد ازعجتك رائحتي،
لاني كنت ادخن سيجارة، 
انتظر لتشم رائحة العرق من تحت ابطي،
الناجمة عن استغلال رأسمالييك،
الذين تقبل مؤخراتهم، 
ولا تزعجك رائحة سيجارهم الكوبي.
أترى الحذاء المهترئ،
ذاك الذي ازعجك صوته ايضاً
ها قد استبدلته بجزمة جديدة،
ستنزعج اكثر 
حين ادوس بها جمجمتك 
ايها البورجوازي الصغير،
نم هنيئاً في عملك الليلي،
فيما استمتع بقراءة الماغوط.

- لن اجعلك تحمل هموماً كثيرة،
وتتحمل عناء ان تقلني في سيارتك المهترئة،
الى نفس المكان الذي نقصده سوياً، 
سوف استقل المواصلات العامة،
وستذهب بمفردك،
ربما لو كنت تلك القحباء،
لقدت سيارتك في بلاد باكملها،
وانفقت معاشك الشهري،
كي تلعق لك قضيبك،
نم هنيئاً،
بعد نهار مرهق، 
فيما ساعزف بهدوء موسيقى كردية حزينة.

- اطمئن يا رفيق، 
لست متلهفاً كثيراً لمتابعة السهرة النضالية، 
معك ومع باقي الرفاق في اي خمارة. 
لن اقلق راحتكم بعد الآن، 
ولن استدر عطفكم، 
نم هنيئاً،
بعد ان تتقيأ اقداح الفودكا التي شربتها، 
فيما ساذهب الى السينما منفرداً، 
لاشاهد فيلماً لتاركوفسكي.

- ها قد وصلنا ال حل جذري.
كل محاولاتي للتقرب منك باءت بالفشل، 
لا بأس،
نامي هنيئاً في حضن عشيقك،
ودعيه يضاجعك ان امكن، 
فيما افضل ان اظل منفرداً
وأكتب قصائد غزل لعشيقات وهميات. 

- اغدروا بصلات الدم والصداقة ،
اغدروا بالروح الرفاقية،
استفزوا في السياسة ما شئتم، 
واهينوا واشتموا ما استطعتم، 
قهقهوا ملء اشداقكم، 
فيما سأضع سماعات في اذني 
وارفع صوت راندي بلايث،
ناموا هنيئاً يا سفلة.

الخميس، 24 يناير، 2013

27 سنة: اتعرى امامكم



سئمت تكاليف الحياة ومن يعش           ثمانين حولاً لا ابا لك يسأم
هيدا زهير بن ابي سلمى من العصر الجاهلي مل الحياة بعد 80 سنة. هلق انا مليت الحياة عال 27 ويمكن ابكر. بس انو مفروض نكمل لانو ما في حل تاني الا الانتحار. والانتحار مش مطروح حالياً مش لانو حرام والمشايخ ما بيصلو عالمنتحر (مين طالب منون يصلو اصلاً، بدل ما يصلو منحط اغاني Suicidal Black Metal) مش وارد لانو عم تخالف قوانين الطبيعة. بس الموت بدو يصير بيصير وما في قوة بترجعو وهيدا شي بيصير مع شباب بعمرنا مش بعيد يعني.
هلق انا بعد 27 سنة جايي اتعرى . مش رح اتعرى متل علياء المهدي، يمكن لانو جسمي مش حلو وسكسي. هلق حتى علياء جسمها مش حلو وسكسي بس عملت يللي عملتو من منطلق هجومي وصادم للاديان. في جرأة مخيفة هون. جرأة التعري وكتابة اسلام او مسيحية او يهودية على اعضاء تناسلية. هلق انا ما عندي الجرأة لاتعرى جسدياً (هيدا نابع من الخوف) بس انو عندي الجرأة لاتعرى نفسياً. وهيدي هون فيها مرجلة. مش انو الهريبة تلتين المراجل، لا مواجهة الواقع تلتين المراجل (مش عم قول اني تشي غيفارا او لولا عبود مثلاً). بس قليل بمجتمعنا الشرقي يللي بيواجهو الواقع بفظاظتو.
معليش عم احسب هال 27 سنة وعامة بما اني سلبي ومن اتباع ابو العلاء المعري  بلشت بالسلبيات في كتير اشياء بحياتي ما بعملها.
انا خيي ما بعرف اسبح مثلاً، ما تعلمتها. سكي ما بعمل، مش طالع عفاريا (يمكن ما كان مع مصاري ولا فرصة لاطلع). الرقص ما بحبو، جربتو وفشلت (عقولة سحاب: انا والله ما بعرف ارقص مني حاسب هالحساب و قاري فيكون كذا كتاب). شو بعد بدك عال night ما بروح خيي، مش جوي ولا جوي سهرات بالاوتيلات والمطاعم. وفي اشياء كتير بعد. المهم انو في اشياء بيصير صعب بعمر مأخر تعملها كان لازم تعملها من الاول والا بتروح عليك. خيي السواقة بلشتها السنة جدياً بعد جهد وعناء مضنيين. السنة لاشتريت سيارة. هلق صحيح ان تأتي متاخراً افضل من ان لا تأتي ابداً، بس انو اساساً في مطارح ما فيك تروح عليها متأخراً اذا ما بتحبها (Sky bar  مثلاً). ورغم هيك بعدني ما بحب السواقة كتير بفضل اطلع بسرفيس. بفضل راحتي الشخصية عرأي العالم.

وغير هيك عندي مشكلة بالعلاقات العاطفية مع النساء، خيي صراحة عدا عن انو صبايا هالايام  صايرين اضرب من الخسة  تبع زياد الرحباني، عدا هيك انا عندي نقص بالعاطفة. من شو ناجم الله اعلم. واكتر عندي خجل وخوف وقصص تانية. يعني من الآخر بفضل روح عالبار ولا استغل بنت بعذريتها مثلاً وابلفها (عقولة ابونا زياد ما غيرو)، هلق بالبار عم تستغل امرأة تانية كمان وهيدا بيناقض مفهوم لينين. بس لينين ما كان عايامو في Mini Jupes  مثلاً. كان في خبز وعلم وحرية. بفضل يا خيي مارس العادة السرية (ايه بس بسرية) عاساس انو في حدا بالعالم ما بيعملها. بس ما حدا بيتجرا يقولها (هيدي متل الطوايف بلبنان كلون بيكرهو بعضون بس مش مستعدين يقولوها عالاعلام). فهون بدنا ثورة جنسية ولينين ما كانت عايامو بس بعدين بس اجت مدرسة فرنكفورت مع ماركوزه وادورنو وغيرون عملو شي اسمو الفرويدو-ماركسية ودمجو البعد الاقتصادي للاستغلال تبع ماركس بالبعد الجنسي تبع فرويد ، كانت ايام الستينات والسبعينات غير شي. في نوستالجيا فظيعة لهيديك الايام، نوستالجيا للعنف الثوري مع وديع حداد وكارلوس وليلى خالد و ابو ديا واوكاموتو وبادر ماينهوف وكتار. شو بدك اليوم اللي بيروح ما بيرجع متلو.
غير هيك انا شخص مش اجتماعي كتير وعندي كره فظيع للمجتمع. المجتمع بصيغتو الحالية وبناسو بشكلون الحالي. بالنفاق وبالتقاليد البالية وبغرها. وعندي كره للنظام خليتو ياخد بعدو السياسي عبر كوني شيوعي بس احيان بحس حالي انارشي وتحديداً انارشي فردي Individualist لانو الانارشية انواع في انارشو-شيوعي وفي انارشو-فردي وفي انارشو-بيئي وفي انارشو-ديني (تولستوي مثلاً جمع الانارشية بالدين شي متل انو وليد جنبلاط اشتراكي او نبيه بري علماني). فهيدي الصيغة السياسية الخلطة الشيوعية الانارشية الراديكالية عم تخليني كون فردي بكتير احيان. وانا اساساً بحب الوحدة فعم يزيد الموضوع.

بعد فينا نحكي كتير عن سلبيات، بس خلينا نحكي كم ايجابية، احلى ما تصير الصورة سودا. خيي ب27 سنة عملت مهندس طويل عريض (هلق مني طويل وايضاً رفيع كتير صعلوك يعني ). بس انو مهندس وعم اشتغل وماشي حالي وعم كمل ماجستير كمان. اشتريت ارض (مع اني ما بحب الملكية الخاصة لانو جدي كان راسمالي وصار LumpenProletariat منشان هيك اهم من الارض يللي مساحتها 2000 متر مكتبة بغرفتي مساحتها متر واحد، صورة جورج عبدالله وكتاب للماغوط و كاسيت قديم لفيروز اهم من صنوبرة مثلاً). واشتريت سيارة (اهم شي فيها المسجلة لانو فيني حط Lamb Of God  وعلي الصوت وهون بحس حالي عم انتقم لسنين من الاضطهاد من المجتمع كلو. بحس حال كاني عم ادعس روتانا تحت اجري، بحس بنشوة كاني عم ضاجع هيفا وهبي). وعامل محاولة عازف عالبزق او الساز (مني شيفان يعني بس ماشي الحال). وبعدني يساري وراديكالي وكتير تمام. غير هيك غير حب الموسيقى (عزفاً وسماعاً) والمطالعة والكتابة ما في شي.
باختصار ومتل ما قلنا بقصيدة سابقة :
 انا رجل غير عادي ،
ولا يهمني عدد الاصدقاء والمعجبين ،
انا اصلاً لا يعجبني العالم ،
و اذا لم اعجبهم
...

الجمعة، 11 يناير، 2013

كنا خمسة بالتاكسي 8: تلج

كنا خمسة بالتاكسي. 
ايا خمسة. كنا شي 12-13 انسان محشورين بفان هيونداي والدنيا نازلة تلج. الهدف انو يفترض نوصل عبيوتنا. وكنا مستعدين نتحمل كتير اشياء راغب علامة عم يغني: "علثان اعثلك ايامي واحث بيك دايما حنبي". راغب علامة عم يلغز من مسجلة الفان. والشوفير كل دقيقتين يزتلو مسبة لكل انسان بيشوفو ماشي او واقف عجنب الطريق. "شو مضهرون اخوات الشرموطة بهالطقس مجانين". ما خلا انسان من شرو.
 بس الاحوال الجوية السيئة تكالبت علينا. وصلنا بعاليه وما عاد الفان قدر يكمل. قال هون آخر الدني. لحسن الحظ عنا مطرح ببيروت نلفي عليه. رجعنا يومها ونطرنا شي يومين ببيروت لفرجها الله ورجعنا عضيعتنا.
لحسن الحظ انو نحنا عنا محل نلفي عليه بس في كتير ناس ما عندون. واحد من هالناس "علي بلس". علي مات من البرد بشارع بلس. لانو ببساطة مشرد ونظام ميشال شيحا العتيد ما بيهموا الفقراء. 
للصراحة انا ما بعرفو لعلي. بس مجرد انو كنت شوفو بشارع بلس وفكر انو ليش هالانسان هيك. وبعد ما مات علي في كتير ناس حكيو عنو وناس انتقدو انو ليش عم تحكو عنو وما ساعدتوه. بس التضامن مع قصة علي هوي تضامن من منطلق انساني ومن منطلق سياسي بوج النظام اللبناني.

ما بعرف قدي صحيحة خبار انو اسمو علي وانو كان دكتور وانو عيلتو ماتت بالحرب وغير قصص طلعت بس اذا كانت صحيحة بيكون علي ضحية هالنظام. 
علي يمكن كان مجنون يمكن كان عاقل. الله اعلم يمكن اعقل منا كلنا. 
احيان بفكر كون متل علي. قد ما بفكر. ما شي عايش بالشارع وعم دخن سيجارتي بالشارع كمان. 
علي مات من التلج. يمكن. بس في تلج من نوع تان في تلج عاطفي. وفي برد انساني كان علي عم يعاني منو وفي ناس ببيوتون كمان عم يعانو منو. والاسباب معروفة. هيدا النظام براسماليتو وبطائفيتو و ليبراليتو. 
منشان ما يصير فينا متل علي عم نتضامن مع قصة علي. ويللي كتير عم يحكو انو ما بتعرفو وما ساعدتو على اساس انو هني او غيرون يللي كتبو عن محمد البو عزيزي مثلاً كانو يعرفو وعم يساعدو. لا يا حبيبي علي والبوعزيزي هني نماذج من مجتمعنا بتحتم علينا ناخد موقف. 
صحيح البوعزيزي عمل ثورة بس بستبعد ماساة علي تعمل ثورة. لانو قبلو قصة آل زغيب ما عملت شي وكتير قصص بلبنان. في كمية من التخاذل بالشعب اللبناني. كمية من الثلج محاصرتون ومانعتون يعملو شي. الا ما يدوب التلج ويبان المرج يا علي. 

الخميس، 10 يناير، 2013

جورج عبدالله الى الحرية اخيراً

اليوم اصبح جورج عبدالله حراً.
اليوم وبعد نضال طال ثلاثة عقود سيخرج جورج عبدالله الى الحرية في الايام القادمة ويعود الى ارض قبياته.
سيعود جورج بدون منة من احد. 
لا من احزاب ادعت المقاومة ونست هذا المقاوم في سجنه
ولا من كتل نيابية ونواب تاجروا بالقضية لصوت من هنا وصوت من هناك 
ولا من رؤساء جمهورية وحكومات ونواب يرضخون لامهم الحنون 
ولا من انظمة ممانعة تلتهي بقتل شعبها
سيعود جورج منتصراً لوحده على الصهيونية والامبريالية الاميركية والفرنسية والرجعيات العربية 
سيعود جورج فقط بفضل صموده اولاً 
وثانياً بفضل تضامن منظمات يسارية عربية وعالمية وفرنسية معه كالانقاذ الاحمر العالمي والعربي
وثالثاً بفضل تضامن اتحاد الشباب الديموقراطي والحزب الشيوعي اللبناني و ناشطون يساريون لبنانيون 
سيعود جورج لوحده منتصراً 
هنيئاً الحرية لجورج وان لم تفارقه يوماً. 

الجمعة، 4 يناير، 2013

كنا خمسة بالتاكسي 7: عنصرية

كنا خمسة بالتاكسي. هيدي من اكتر من 8 سنين، كنت متجه من جامعتي برومية على نهر الموت. منطلع بتاكسي وبيطلع معنا ناس وبيدور حديث مع شوفير التاكسي. 
هلق انا عادة ما بحب افتح احاديث مع الشوفيرية لانو ما بتقدم ولا بتاخر. بعدين الصمت تعبير كتير بليغ. وحتى لو غير راكب كان عم يحكي انا ببقى صامت.
الحديث كان وقتها قبل 2005 يعني كان بعدو الجيش السوري موجود بلبنان. شوفير التاكسي فتح حديث مع الشب حدو وتبين انو تنينون من منطقة بشري. وجر الحديث لشتم السوريين والفلسطينيين ولما اكتشف انو زميلو كمان حارس لارز الرب - جل جلاله سالو ليش ما بتشتغل مع مخابرات الجيش وبتلقط هالجية السورية والفلسطينية. (شي بيشبه سعيد عقل لما دعا اسرائيل تخلصو من جية الفلسطينية). 
تذكرت هالحديث مؤخراً لما كنت مبارح بالتاكسي وسمعت انو جبران باسيل انطلاقاً من موقف وطني (يحتم عليه التضامن مع حليفه الجديد بشار الاسد) طالب بمنع توافد اللاجئين السوريين والفلسطينيين. جبران باسيل وصف موقفو انو مش عنصري. هيدا موقف متناغم مع مشاركة عون والجيش بالتعاون مع الجيش العربي السوري بقصف تل الزعتر سنة 1976 وموقف متناغم مع سنين من الحقد على السوري كسوري خلال الطائف اما التحالف الحديث مع الاسد للوصول الى الرئاسة بطبيعة الحال ما بتغير ما في النفوس. وهالتحالف قائم (وبدون ما نتخبى ورا اصبع بيار ابي صعب)بناء على خوف اقلوي علوي شيعي مسيحي من الاكثرية السنية. 

على المقلب الآخر مقلب التحالف بين مسيحيي 14 آذار والاكثرية السنية بناء على تخوف من هيمنة حزب الله وسلاحه وبناء ايضاً على تاريخ يضج بالحقد على السوريين والفلسطينيين. منشان هيك منسمع سامي الجميل عم يحكي بنفس منطق جبران باسيل. الاثنين خريجي نفس المدرسة - مدرسة الجبهة اللبنانية. ومنشان هيك منسمع نايلة تويني ابنة جبران تويني يللي وصف جزء من اللبنانيين بالغنم، نايلة كانت عم تحذرنا من خطر المستوطنات الفلسطينية القادمة. حسيت انو الفلسطينيين رح يعملو كيبوتزات بلبنان. 
منيحة من نايلة جبران باسيل (عنسق ياسر عرفات حجازي و فريال كريم بقرادوني. ) . توينا نايلة تويني (عراي زياد سحاب). هل صحيح انو انكرها المطران الياس عودة لانو تزوجت من مالك مكتبي الشيعي وتخطت الاحمر بالخط العريض. 
هدا غيض من فيض من شي متاصل بالشعب اللبناني ضد السوري والفلسطيني وضد العمال والعاملات الاجانب عامة وفيك تلاقي بسهولة بكل وسائل النقل العامة هالحقد والكره. 
يبدو انو العنصرية متل الطائفية لازم تقتلع من النفوس قبل النصوص. 

الأربعاء، 2 يناير، 2013

ما تبقى لنا

‎"في يدينا بقية من بلاد                 فاستريحوا كي لا تطير البقية"
هذه كانت دعوة الشاعر الفلسطيني الكبير ابراهيم طوقان للزعماء والملوك العرب وذلك قبل ان تحدث نكبة فلسطين بزمن. ولكن الملوك عادة قليل ما يستانسوا برأي الشعراء ان لم يكن مديحاً لهم. لذلك مرت هذه الدعوة عابرة واستمر الملوك والزعماء الذين اتوا من بعدهم، تقدميين ورجعيين، استمروا في نفس النهج الى ان وصلنا الى ما نحن عليه الآن. 
الى ان وصلنا الى بقية من بلاد تطير تدريجاً. ما تبقى لنا اليوم هو بقية البقية. 
و "ما تبقى لكم" هي رواية للشهيد غسان كنفاني وهي رواية تسرد معاناة اسرة فلسطينية واكتشافها الوعي الضروري بالقضية الفلسطينية في رواية كما روايات كنفاني ينسجم فيها الجانب الفردي بالجانب الوطني-القومي. 

ما تبقى لنا اليوم في فلسطين مجموعة قرى على جزء من 22% من فلسطين التاريخية مسيجة بمستوطنات وجدار عنصري فاصل وهذه المجموعة اصبحت دولة معترف فيها في الامم المتحدة مؤخراً ولكن من دون عضوية كاملة كالفاتيكان. اما مجموعة القرى الاخرى في جنوب فلسطين ففيها دولة اخرى تحت حكم الاخوان المسلمين حالياً وعرضة لعدوان اسرائيلي في اي لحظة كالذي حصل منذ شهرين. 
ما تبقى لنا في سوريا بعد 40 سنة من حكم البعث هو دولة مدمرة، حرب طائفية، قاعدة وسلفيين وشبيحة، قلاع تاريخية مهدمة، 200 الف قتيل،لاجئون سوريون في بلدان مجاورة انضم اليهم مؤخراً لاجئين من مخيم اليرموك الفلسطيني بعد ان انتفض على حكم احمد جبريل وقيادته العامة البعثية فدكه جيش الممانعة بالقصف وهجر اهله دفاعاً عن قضية فلسطين، مأساة تعيد التذكير بالنكبة وهجرة فلسطينية اخرى بعد هجرات تل الزعتر وبرج البراجنة والبارد وغيرها. 
ما تبقى لنا في مصر بعد كامب دايفيد والسادات ومبارك دولة تحت حكم الاخوان المسلمين الذين اتوا بصناديق الاقتراع ليقوضوا الدستور والديموقراطية. 
ما تبقى لنا بعد 30 سنة من حكم صدام في العراق دولة تحت حكم الاحتلال الاميركي يتخللها دويلة للاكراد بعد ان عانوا الامرين تحت حكم صدام فاصبحوا في فيديرالية هي اليوم على وشك حرب مع الدولة المركزية في بغداد نتيجة الخلاف على تقاسم البترول، والدولة المركزية في بغداد هي بقيادة شيعية تحت تاثير ايراني وتعرض الجماعات السنية لنفس الحكم الذي تعرضت له سابقاً على ايديهم.
ما تبقى لنا في ليبيا بعد 40 سنة من حكم الاخ القائد لادولة ولا لجان شعبية بل عصابات مسلحة وقبائل وناتو وبترول موزع على الدول الكبرى. 
ما تبقى لنا في تونس ايضاً بعد حكم زين العابدين بن علي دولة ايضاً تحت حكم الاخوان المسلمين يتخللها جماعات سلفية تحاول القضاء على منجزات العلمانيين في تونس وثقافتهم.
وما تبقى لنا في اليمن بعد حكم علي عبدالله صالح دولة قبائل يحكمها حزب صالح نفسه يتخللها خلاف ديني مع الحوثيين في شمالها وخلاف مع الانفصاليين الجنوبيين في جنوبها. 
وما تبقى لنا في السودان دولتين بدل الدولة الواحدة، دولتين في حرب مع بعضهما البعض وفي حرب داخلية كل واحدة منهما. 
وما تبقى لنا في الخليج هي ممالك وهابية تقمع شيعييها ومعارضيها وتتخم بالبترودولار لتصرفه على ناطحات السحاب وعاهرات الغرب. 
وما تبقى لنا في لبنان تحاصص طبقي-طائفي يتبدل المواقع السلطوية ويتقاسم راس المال في البلد ويتبع لخارج من هنا او من هناك.

في ظل كل هذا الخراب يتخيل المرء انه لم يبق لنا شيء. ولكن لحسن الحظ يبقى بعض بصائص الامل.
يتبقى لنا صواريخ كتائب الشهيد ابو علي مصطفى ويتبقى لنا عناد مناضلي الاتحاد التونسي للشغل وتتبقى لنا اعتصامات الاشتراكيين الثوريين في مصر ويتبقى لنا نكات كفرنبل على البعث ومعارضته ويتبق لنا صورة جورج ابراهيم عبدالله على طرقات لبنان. 
تبقى لنا هذه الذكريات للسنة القادمة التي نتمناها ان تزيد ما تبقى لنا.