الاثنين، 17 ديسمبر 2012

رسالة عبر رشيد الى سمر

رشيد، 
فيني احكي مع "سمر" تاعولي، ورح سميها سمر ايضا َ حفاظاً على السرية المصرفية. معليش انت صدرك رحب. خليني عبر. 
انا كمان هزني هالمقطع يللي قريتو بمقالتك بس جزء منو بيمثلني.  
اسمعي يا سمر: " انا رجل مريض، انا انسان خبيث. لست املك شيئا مما يجذب او يفتن..."
انا كمان يا سمر عندي كتير افكار متل رشيد. بس ما بقدر عبر عنها احيان كلامياً وخاصة اذا كنت مباشرة امام فتاة بهالجمال. فجأة هيك بيتبخر كل الشعر والادب والرواية. بتعرفي شو يعني "بتبلكم" . ايه هيك بيصير. 
هلق انا خجول بطبعي ويمكن مصطلح المرض و الخبث اللي اقتبسنا عن الاخ رشيد ما كتير مناسب لوصف حالتي انو الخجل والخبث والمرض ما بيركبوا مع بعضون. بس فيها جزء من مرض الخجل وخبثنة الخجل. هيك بدك تفهميهون. 
انا عم اقرا اشياء منقالة بتعبر عن حالتي بشعر الماغوط مثلاً. في اعظم منو للماغوط. اسمعي هالمقطع: 
أيها الربيعُ المقبلُ من عينيها
أيها الكناري المسافرُ في ضوء القمر
خذني إليها
قصيدةَ غرامٍ أو طعنةَ خنجر
فأنا متشرّد وجريح
أحبُّ المطر وأنين الأمواج البعيده
من أعماق النوم أستيقظ
لأفكر بركبة امرأة شهيةٍ رأيتها ذات يوم
لأعاقرَ الخمرة وأقرضَ الشعر
قل لحبيبتي ليلى
ذاتِ الفم السكران والقدمين الحريريتين
أنني مريضٌ ومشتاقٌ إليها
انني ألمح آثار أقدام على قلبي .
اذا عجبك كملي هون 

هاي الرومانسية مشكلة كمان منا هينة. شب رومانسي يا سمر بدك تلاقي حل. 
وانا (اعوذ بالله من كلمة انا - بس مضطرين نستخدمها هون). انا يا سمر متل خيي رشيد تمام كمان ما كتير بحب العالم بشكل عام. وفيني اعطي امثلة عديدة عكره العالم. ايا واحد مهووس باي تلفون ذكي بالعالم هيدا بيزعجني، وايا واحد بيضحك عنكت المدير وبيمسح جوخ المدير ، وايا واحد اساساً ما بيرد المرحبا. وايا واحد بتكون بتعرفو وقاعد معو وبتشوفو مرة تانية بيعمل حالو مش عارفك والانكى انو عارفك وهاي اكتر شي مزعجة مع الرفاق صراحة، ايا واحد بيقلك خيي وحبيبي وخيي الاصلي وبيكون عم يخيطلك خوازيق، وايا وحدة ضاربة حالها بسرماية عتيقة، و كتير ناس غيرون. بلا ما نعد. 
شايفة يا سمر لو طبعي عدائي شوي، لو مني صعلوك ايه كنت فتكت بسما ربون واحد واحد متل رشيد بالمسرحية. والله كنت سكرت السير بالحمرا. بس انا يا سمر صعلوك وهاي نقطة ما كتير جذابة. تخيلي زعران الشارع عم ينمرو عليكي وانا عم اتصعلك شو بيكون موقفك؟ 
وايضاً يا اخت سمر عندي كمان رغبة فظيعة بالوحدة متل رشيد. بفضل كتير الوحدة. انا صرلي فترة اكتر من رشيد صرلي حوالى ال 10 سنين تقريباً لوحدي (على الاقل بغرفة لوحدي). صاير بس اقعد مع عالم انزعج. ومحاولات القعدة مع ناس مقربين واصدقاء وصلت لخلافات وسوء تفاهمات بدا وقت للانسان يصلحها. آخر شي بحط مريم صالح وبقعد بسمع: 


وسمر يمكن انتي كمان كتير اجتماعية وانا كتير فردي. هيدي الشغلة بدا وقت لتنحل. وانا من النوع يللي بدي فترة تكون صداقة. مني ونس بالعربي المشبرح. وانا ما بضحك غير للناس الموثوقين - هودي في بيني وبينن رغيف سخن. 
هلق رشيد بت الموضوع انو ما في امل خالص بالنسبة لالو. انا مخلي حبل امل بس انو بدنا نحل كل هالقصص الآنفة الذكر. اذا قدرنا حليناها كان به والا فلا حول ولا قوة الا بالله والصلاة والسلام على نبي المرسلين وخاتم النبيين. آمين. 


الاثنين، 10 ديسمبر 2012

خير جليس في الزمان

أعزُّ مكانٍ في الدُّنى سرجُ سابحٍ *** وخير جليسٍ في الزمانِ كتابُ

هكذا عرف ابو الطيب المتنبي الكتاب. وهكذا اقتدي بالمتنبي. 
فحين يعز الاصدقاء ليس هناك افضل صحبة من الكتاب. هو لا يغشك، لا يزعجك، لا يؤلمك بل بالعكس يساعدك و ينير طريقك.
هو الرفيق الوحيد الذي اصطحبته منذ 7 سنوات ونيف. حين اهتديت الى طريق المعرفة والثقافة.
وقد رافقني في كل الاماكن من غرفتي الى جامعتي الى عملي. ومن الكتب الورقية الى الاكترونية (سواء عبر الكمبيوتر او التيليفون).
وطبعاً للكتاب الورقي مكانة خاصة تفوق الالكتروني مهما تقدم لذلك فقد عملت على بناء مكتبة متواضعة اطمح في توسيعها بما اوتيت. خاصة اني ازهد في الثياب او الطعام لاشتري كتاباً او مجلة او جريدة. وحين لم اكن استطيع الشراء كنت اشترك في مكتبة عامة واستعير كتباً على مدار السنة.
وللكتاب مواقعه واهمها بدون شك معرض الكتاب. طبعاً بالاضافة الى مكتبات الحمرا العاملة على مدار السنة. والمكتبات العمومية التي نتمنى تنشيطها وتزويدها بكافة الامكانات خاصة في الارياف النائية.
اما معرض الكتاب فهو بالنسبة لي ارقى مكان تجولت في ارجائه ليومين متتاليين لمدة تفوق ال 9 ساعات واستطعت الحصول على عدة عناوين قديمة في الشعر والادب والسياسة وغيرها وذلك باسعار زهيدة نسبياً من دون التطرق الى المؤلفات الحديثة المرتفعة الثمن. 
هي زوادة تكفينا لقادم الايام حتى اللقاء في معرض السنة القادمة.