الجمعة، 13 أبريل 2012

تنذكر ما تنعاد

اليوم 13 نيسان. يعني تنذكر ما تنعاد. كذا شغلة لازم تنذكر ما تنعاد وكذا تحية لازم تنقال. 
يوم اللي تم اغتيال القائد الشهيد معروف سعد . تحية لمعروف القلعة اللي كان حامينا. 
يوم اللي استشهدوا بالبوسطة بغض النظر عن صحة خبرية بيار الجميل. وبغض النظر عن تجاوزات بعض الفصائل الفلسطينية. تحية لشهداء البوسطة. 
يوم اللي دخلت قوات النظام السوري تحت مسمى قوات الردع العربية لتقمع اليسار اللبناني والمقاومة الفلسطينية. تحية لكل اللي تصدولو بصوفر وصيدا وبيروت. 
يوم اللي تم اغتيال القائد الشهيد المعلم كمال جنبلاط على يد نظام البعث. تحية لروح المعلم.  
يوم اللي سقط تل الزعتر تحت قصف الميليشيات اليمينية العنصرية وبتغطية من الجيش السوري الممانع بعد حصار اشهر. تحية لشهداء تل الزعتر وللمناضلين اللي كانوا يهربولون سلاح من المونتيفردي. 
يوم اللي تم اجتياح الجنوب للمرة الاولى عام 1978. تحية للمقاتلين بجبهة المقاومة الشعبية لتحرير الجنوب من الاحتلال والفاشية.
يوم اللي تم اجتياح الجنوب ولبنان للمرة الثانية عام 1982. تحية للمقاتلين بالقوات المشتركة بالثورة الفلسطينية والحركة الوطنية اللبنانية .
يوم اللي سقطت بيروت اول عاصمة عربية تحت الاحتلال. تحية لجورج حاوي ومحسن ابراهيم ورفاقون وكل المقاومين بجبهة المقاومة الوطنية اللبنانية "جمول" من خالد علوان لجورج قصابلي.
يوم اللي اجا بشير الجميل رئيس جمهورية عظهر الدبابة الاسرائيلية . تحية لحبيب الشرتوني اللي انهى هالكارثة. 
يوم اللي ارتكبت ميليشيات اليمين اللبناني مجزرتها التاريخية بصبرا وشاتيلا. تحية لارواح شهداء المجزرة.
يوم اللي فاتت القوات اللبنانية والجيش الفئوي عالجبل والاقليم وصيدا والضاحية وارتكبت مجازر بعبيه وكفرمتى. تحية لارواح الشهداء والمقاتلين بجيش التحرير الشعبي واللي حرروا الجبل والاقليم وصيدا والضاحية بانتفاضة 6 شباط.
يوم اللي انسحبت اسرائيل حتى الشريط الحدودي تحت ضربات مقومي جمول. تحية لرواح الشهداء : جمال ساطي ولولا عبود وسناء محيدلي و كتار غيرون. 
يوم اللي فاتو التوحيد عطرابلس وارتكبو مجزرة المينا. تحية لارواح الشهداء. 
يوم حرب المخيمات . 3 سنين من حصار حركة امل المقاومة بدعم سوري لمخيمات فلسطينية. تحية لكل يللي صمدوا بمخيماتون.
يوم اللي تم اغتيال كوادر الحزب الشيوعي والمقاومين على ايدي مقاومين مفترضين. تحية لروح مهدي عامل وحسين مروة ورفاقون. 
يوم اللي انتهت الحرب وتوقع اتفاق الطائف. كمان تنذكر ما تنعاد لانو كرس حرب اهلية باردة صرلا 20 سنة رح تضلها تتجدد بظل النظام الطائفي وتنعاد. 
وبعدنا منقول تنذكر ما تنعاد عن شي عم ينعاد يومياً. 





ليست هناك تعليقات:

إرسال تعليق