الأربعاء، 28 مارس 2012

ردوا المسرح لبيروت

- "ردوا المسرح لبيروت... مسرح بيروت ما بيموت". صرخة رددها الناشطون امس انطلاقاً من مسرح المدينة حتى مسرح بيروت في يوم المسرح العالمي.
مسرح بيروت هذا المسرح الذي يختزن ذاكرة المدينة بمسرحييها ومثقفيها اقفل اواخر السنة الماضية. حينها تحرك بعض الناشطين امام وزارة الثقافة فاخذ القرار باحالة المسرح على قائمة الآثار ولم يفتح. اما تحرك امس فكان حاشداً بكل المقاييس. 

في مسرح المدينة ادى عدد كبير من الفنانين وصلات ومقتطفات مختلفة من مسرحياتهم بحضور وزير الثقافة والذي لم يستطع ان يلقي كلمته بعد ضغط من احد الناشطين.
ومن "المدينة" انطلق الحضور في مسيرة جابت شارع الحمرا وصولاً الى عين المريسة حيث تجمع الناشطون والفنانون وهتفوا ورقصوا واستمعوا اخيراً الى كلمة اليوم العالمي للمسرح (للممثل الاميركي جون مالكوفيتش) القاها المسرحي عصام بو خالد (الذي كان مسؤولاً عن مسرح بيروت مؤخراً). 

هذا التحرك الاحتجاجي صرخة في وجه تضاؤل المساحات الثقافية فكما اقفل مسرح بيروت وقبله مجموعة اخرى من المسارح كذلك اقفلت مجموعة من المراكز والحانات التي كانت تعنى بشؤون ثقافية وفنية. كل هذا حرك الناشطين وادى الى تجمع حاشد يفوق ما نشاهده في بعض التظاهرات السياسية. 
قد لا تفوق علاقتي الشخصية بالمسرح سوى ادائي الوحيد على خشبته في الصيف الماضي  وقد لا تفوق علاقات البعض سوى مشاهدة العروض المختلفة ولكن بكل الحالات اتت اهمية تحرك امس لتجمع شتات المثقفين بوجه تحويل بيروت من واجهة ثقافية الى واجهة تجارية.
ومن بيروت وجه المسرحيون ايضاَ تحية الى رفاقهم في تونس والذين تعرضوا لاعتداء من مجموعات سلفية اثناء احتفالهم بيوم المسرح في تونس. 
نتضامن من لبنان مع مسرحيي تونس بوجه "نصرة كتاب الله" ومن لف لفهم 
ونتضامن من لبنان مع كل مسرحيي العالم العربي  وفنانيه بوجه الهجمات الظلامية من مصر الى اليمن 
ونتضامن من لبنان مع مسرحيي لبنان ومثقفيه بوجه الهجمات التجارية والرقابية. 

الجمعة، 23 مارس 2012

النظام بين بيروت ودبي

- حلوة دبي شو بدكون بالحكي يا اخي. مدينة مصطنعة بس حلوة . ومدينة منظمة. يمكن اول مدينة عربية فيها نظام . في مصاري مدفوعة بكمية منشان تصير حلوة بدون شك. وكان ممكن تندفع بغير محل (بفلسطين مثلاً) بس هيدا موضوع سياسي والو تتمة. كمان في كمية من العمل صارت منشان تنبنى هالابراج على ضهور العمال الآسيويين بشكل رئيسي بس هيدا موضوع طبقي والو تتمة.
موضوعنا هوي النظام. نظام السير مثلاً. في نظام للسير مش متل عنا. يا اخي بدبي الاشارة حمرا ما حدا بيقطع لانو بيعرف حالو رح يموت بينما عنا بلبنان بيقطع وراسو مرتاح وبيقول باي للكاميرا يللي حاطينها منشان تراقبو وبيحيي الدركي كمان يللي مفروض ينظم السير. اشارة حمرا ما هيك. 
ولك بدبي اذا في مشاة على طريق فرعية بيخلوهون يمرقو. شي متل اميركا. في احترام للمشاة. ايه هوني بيطلع عليك. ما عم تأخرو بالنهاية. 
خدلك نظام المواصلات يا اخي التاكسي في عداد. يعني بتعرف انو ما رح يقرطك سلف. في عداد وبتدفع عقد المسافة. هون ببيروت بتدفع عمزاج السائق. يعني هون ممكن تطلع اول نهار من المحل الفلان عالمحل الفلاني ب2000 ليرة. تاني نهار نفس الطريق ممكن يطلب منك شوفير ما 10000 ليرة. كيف بايا منطق. ما حدا عارف شي من شي. 
يا اخي ليش تخيل انو مطرح ما في عجقة بدبي . بشي "مول" مثلاً بدك تنطر بالدور منشان تاخد تاكسي. مزودينا مش هيك. ايه معليش تعود عشي اسمو "الصف" هيدا ما في منو بلبنان. وهيدا الصف ما بيميز بين اسود وابيض وهندي ووو .. هيدا بينطر في الاوروبي (يللي بتعتبدو بلبنان) متلو متل الباكستاني متل اللبناني متل الشاطرين. ما في تمييز عنصري. وما في "عارف حالك مع مين عم تحكي".

نفس الشي بالباص بتقطع بطاقة وبتنطر بالصف. وبتمشي عالوقت من المحل الفلاني عالمحل الفلاني. ايه بلبنان باص رايح من عين المريسة عنهر الموت ممكن تهبلو يكوع عالدورة مثلاً اذا ما معو ركاب وباص رايح من انطلياس عالحمرا ممكن يوقف بالاشرفية حتى يروح يرتاح ببيتو عشية خيي. بعدين عندك المنافسة بلبنان قليلة المنافسة. خود مثلاً بين باصات الحريري وباصات المر عخط المتحف- برمانا مثلاً. انو الاسلام عم يجو عبرمانا. كتير هيك. وفي خطوط محتكرة يعني خطوط الشوف مثلاً ممنوع يطلع عليها جحش الدولة والا بياكلها قتلة من زلم وليد بيك. وفي خطوط حاطين عليها شوفيرية من الاخوان السوريين يللي بعض منهون ما بيعرفو البلد يا اخي. يعني ممكن يطلع راكب ويقلو رايح عالمحل الفلاني فبيقلو لا وهوي بيكون قاطع بنص دين المحل الفلاني. رواق عالآخر. 
بعدين عندك الوقت. مهم الوقت شي. بلبنان اكيد لا. يعني ممكن الباص ينطرك ربع ساعة ليحمل ركاب. او "يحدل" عالطريق شي نص ساعة. الك معو شي. بعدين "كل ربع ساعة بيمرق باص" هيدي اكتر شي غلط. يعني ممكن يمرقو تلات باصات خلال خمس دقايق ويقوطبو عبعضون ويسبو لبعضون وتمرق ساعة ما يمرق ولا باص.منافسة. شو بدك تعمل. نظام رأسمالي حر. حر هوي الك معو شي.

انسى يا اخي. ولك بدبي طبقو قانون منع التدخين بالاماكن العامة (ما تفهموني غلط انا بدخن). بس اذا دخنت بالمول مثلاُ بتاكلها غرامة. بينما بلبنان في حال صدر القانون صعب يتطبق بطبيعة الحال.
ليكو خيي اذا بدك تعرف اللبناني بدبي. هوي الوحيد يللي بيدخت تحت ال No Smoking. 
نظام PAL او SECAM. حيالا نظام. بدكون تسقطو النظام. عراية الرحباني :"لتعمل ثورة عالنظام لازم اول شي يكون في نظام وتاني شي يكون في نظام ..... ".

الثلاثاء، 20 مارس 2012

احمد فؤاد نجم: حنطلع دين امهم

- آخر فصول السلفية الاسلامية في مصر بعد اقامة الحد على علياء المهدي والدعاوى على عادل امام و المغنية االبنانية مروى وغيرهم، دعوى رفعها اسلاميون مصريون على الشاعر احمد فؤاد نجم والتهمة سب الدين. 

في تفاصيل الدعوى رفع أحمد سيف الاسلام حماد ـ منسق مركز الدعم المسلمين ـ الجدد بلاغاً ضد الشاعر أحمد فؤاد نجم يتهمه بسب الدين لكل من فريد الديب وحسني مبارك والمشير، ومدحه للشيعة و''سبه'' للسنة. و ذلك خلال احدى البرامج، حيث ظهر فؤاد نجم وتلفظ بالعبارات التالية '' الأستاذ فريد الديب.. الشعب المصري ح يطلع دين أمه''. وأضاف أن المشكو في ـ مداخلة تليفونيةـ  بإحدى القنوات الفضائية ''سب الدين'' وحرض الجنود للخروج عن طاعة القائد العام للقوات المسلحة وتهديد الأخير و ترويعه مشيرا إلى أن نجم قال:''يا سيادة المشير..الثورة مش حتتسرق و اللي حيجى جنب الثورة المصرية، ح نطلع دين أمه''، وتم نشر الفيديو على اليوتيوب تحت اسم ''احمد فؤاد نجم يسب الدين للمشير والمجلس العسكري''  كما ظهر مقطع فيديو للشاعر معنون بـ'' احمد فؤاد نجم يسب السنة ويمدح الشيعة ويقول مش ح صلى وربنا هياخدنى بالحضن'' وتضمن الفيديو الذي قال البلاغ أنه أذيع في ندوة علنية حضرها المئات '' ولاد … بيقولو'' قاصدا من هذا السب أهل السنة .

اذن بات سب دين حسني مبارك و رجله فريد الديب تهمة وبات سب دين المشير والمجلس
 العسكري بوقوفهم ضد الثورة المصرية تهمة ايضاً وبات ابداء الرأي في حرية الصلاة من عدمها تهمة اما الراي في الخلاف الشيعي-السني فهو تهمة ايضاً. هذه هي معايير تحالف السلفيين والاخوان مع المجلس العسكري في مصر الثورة. 

لا شك ان الدعوى هذه لا علاقة لها بسب الدين بل هي مجرد هجوم على شاعر كبير وما يمثله انتقاماً من تاريخه ومن موقفه الحالي من الثورة المصرية بل ويمكننا ان نقول تهجماً ايضاً على ابنته نوارة وهي احدى الرائدات في ثورة 25 يناير. 

في ظل هذه الحملة الشرسة وكما تضامنا مع الفنان عادل امام (برغم الخلاف في الآراء السياسية سابقاً) نتضامن مع اشاعر الفاجومي وندرك انه لن يتنازل فالذي واجه نظام عبد الناصر والسادات ومبارك بكل ما فيها من ديكتاتوريات وسجون لن يخضع لزمرة عسكرية اخرى. 
احمد فؤاد نجم "احنا معاك وحنطلع دين امهم" 

الاثنين، 19 مارس 2012

لحوم فاسدة

الفولكلور اللبناني بيستلزم انو يظهر كل مرة حدث ما للدبكة. دورياً. الدبكة مستمرة. 
آخر اخبار الدبكة: لحوم فاسدة.

انطبلت الارض مؤخراً بقضية اللحوم الفاسدة.
تلفزيونات . اذاعات. اخبار . تقارير. What's App. شو بدكون بعد.
ودعايات عن المطاعم والمحلات يللي عمتبيع هاللحوم .
ليكو يا بابا.
اولاً اللحوم الفاسدة صرلكون كل واحد من وقت اللي خلق عم ياكلها وهوي مبسوط. وبيفشخ عصحابو انو اكلت بالمطعم الفلاني. يمكن هلق بيوقفلو جمعتين اكل بالمطاعم وبس توقف الدبكة بيرجع متل الشاطر عند ملك الطاووق. 
ثانياً. ما بعتقد انو هاللحوم مضرة كتير للصحة. يعني انا (اعوذ بالله من كلمة انا) صرلي شخصياً 26 سنة عم آكل لحوم فاسدة وما صرلي شي.هيدا كلو مناعة يا بابا.
ثالثاً الحلو بالموضوع انو وين. افخم مطاعم يابا مشتركة بالموضوع. يعني هون بيختفي الصراع الطبقي. مش انو بربر او غلاييني عندون بس لحوم فاسدة. لا كمان انو McDonalds و KFC و B2B و غيرون. 
رابعاً واهم شي القضية انو الفساد مش بس باللحوم الفساد بكل تفاصيل حياتكون : زعماء فاسدين وطوائف فاسدة واديان فاسدة واحزاب فاسدة ووزراء فاسدين ونواب فاسدين و مدراء فاسدين . ولا خيي البلد كلو فاسد. قاضية عاللحوم هيي. 
لتوصلو للحوم مش فاسدة بدكون تنظفوا البلد كلوا يا بابا. 




الجمعة، 16 مارس 2012

تعبت يا معلمي

تعبت يا معلمي من النثر والقول السياسي. فركنت الى الشعر والموسيقى.
تعبت يا معلمي من الذكريات. ذكريات تجيء وتؤذي. ذكريات رفاقك  الشهداء التي تبلل ايام السنة. 
تعبت يا معلمي من الديكتاتوريات. فاعلنت وجهك مقبرة للطغاة يرحلون قريباً.
تعبت يا معلمي من الصحف. من الجريدة "افلفشها واسالها صوتك وينو".
تعبت يا معلمي من المشي في الطريق الى المختارة كالقطيع يتبع اقطاعي فجعلت الطريق اليك في فكري. 
تعبت يا معلمي من البيارق. 
تعبت يا معلمي من البنادق.
تعبت يا معلمي فانهض طال ارتحالك وارجع، هي قلة تنتظر.