الأربعاء، 13 أبريل، 2011

رح تنذكر وتنعاد

رح تنذكر وتنعاد . هيك فجة وصريحة .لانو " الكلمة اللي ما تبقى رصاصة تبقى ملعونة وخاينة " .
رح تنذكر وتنعاد . هيك بدون فولكلور لبناني . بدون دبكة وحمص وعتابا .
رح تنذكر وتنعاد . لانو الوحدة الوطنية " طائفية " و " العيش المشترك " طائفي .
رح تنذكر وتنعاد . لانو الشعب اللبناني كذابين ودجالين . كلنا اخوة بالعلن وبدنا نلعن عرضون وما بيتأمنلون بالسر وبين بعض .
رح تنذكر وتنعاد لانو بعد في كتير عملاء لاسرائيل . كتير كتار . وبكل الطوائف للاسف .


رح تنذكر وتنعاد لانو في فاشيين كانوا بصبرا و شاتيلا وتل الزعتر حتى ما نعد اكتر .
رح تنذكر وتنعاد لانو في عنصريين يعدون موجودين عم يكبوا العاملات عن البرندات و يقصفوا الفلسطينيين ويضربوا العمال السوريين .
رح تنذكر وتنعاد لانو في ناس رجعية بدون يرجعوا الخلافة الاسلامية و مقابيلون في ناس بدون يرجعوا عشتروت على فينيقيا .
رح تنذكر وتنعاد لانو في ناس بيحبو حمل السلاح والانتقام والقتل عالهوية . والامثلة الحضارية بينت ب ٧ ايار .
رح تنذكر وتنعاد لانو الحقد بعدو موجود . ما عم برئ حالي ولا حدا وما حدا يتخبى ورا اصبعو ويقول انو ما عندو احقاد .
رح تنذكر وتنعاد وتضلا تنعاد طالما هالنظام موجود . وبما انو الشعب ما حابب انو يسقط النظام اقتداء بثورات العرب " الجرب" فرح تضلا تنذكر وتنعاد .

ليست هناك تعليقات:

إرسال تعليق